Ուղղակի ապրել

« Ապրե՜լ, ապրե՜լ, այնպե՛ս ապրել,

Որ սուրբ հողըդ երբեք չզգա քո ավելորդ ծանրությունը:»

                                                                                     Պ.Սևակ

- Մա՞մ:

- Հա, ցա՛վդ տանեմ, ասա՛:

- Ծխախոտ երկու տուփ կգնես, լա՞վ:

- Դե առանց այն էլ  քիչ է, հազիվ բավականացնի, հաց, սուրճ, շաքարավազ, մածուն:

- Մա՞մ:

- Լա՜վ, լա՜վ, մի կերպ յոլա կգնանք, - մայրը ծալեց երեք հազար դրամանոցներն ու դրեց դրամապանակի մեջ:

* * *

- Մա՞մ, չեմ հասկանում, ժպտո՞ւմ ես, թե՞ լաց ես լինում:

- Չգիտեմ, կորցրեցի դրամապանակս, գտա դրամապանակս…

- Մա՞մ, կորցրեցի՞ր թե՞ գտար:

- Չգիտե՜մ, կորցրեցի,  հետո փնտրում էի ….տեսա մի  կնոջ հաշմանդամի սայլակի մեջ նստած մի երեխայի հետ, մոտեցա, ձեռքին իմ դրամապանակն էր, գիտեի մեջը երեք հազար դրամ կար:

- Մա՞մ, հետո՞:

- Նայեց ինձ ու ասաց. «Տիրամայրը լսեց աղոթքներս, նայի՛ր» - ու ցույց տվեց երեք հատ ծալված հազարանացները:

- Մա՞մ, իսկ ինչո՞ւ ես լաց լինում:

- Չգիտե՜մ…գտա թե կորցրեցի:

- Մա՞մ…