Հեռացող քայլեր

Հեռացող քայլերը միգուցե լքո՜ւմ են,

Միգուցե ուղղակի հեռանո՜ւմ,

Ինչպես աչքի բիբի մեջ թախիծն է կծկվում՝

Աչքի ետևում թաքնվում:

Հղի ձկան նման թաց ու լպրծուն,

Ծանրանում է աչքն ու արցունքոտվում

Եվ

Բաբախում է  ճիշտ սրտի նման

Ո՞վ գիտե վայրկյանում քանի-քանի՜ անգամ:

Արցունքը չի՛ սառում,

Սառած չի՛ կախվում աչքի կոպերից,

Սառույց չի՛ կապում աչքերին,

Բայց չգիտես ինչու սառում են աչքերը

Ճանապարհներին երկա՜ր նայելիս …

Հեռուն գնացող քայլերը պատժամիջո՞ց են լքողի կողմից,

Թե՞ փորձությո՜ւն են, պատի՛ժ լքվողի համար,

Ամեն դեպքում լքո՛ղ են հեռացող քայլերը՝

Սառն ինչպես արյունը ձկան:

Ս.Ումառ-Հարությունյան