Ինձ գի՜րկդ վերցրու…

Ինձ գի՜րկդ վերցրու,

Տա՜ր ուր պատահի…

Պատահի այնպե՜ս՝ դառնամ անտարբե՜ր-

Ծովի այն հեռո՜ւ ալիքի նման,

Որն օրորվո՜ւմ է մի թեթև քամուց,

Ոչ բորբոքվո՜ւմ է,

Ո՛չ էլ դառնանում,

Ո՛չ էլ կախվում է կողքի ալիքի

Փրփուրից անհույս,

Ոչ գիտի ի՞նչու և ո՞ւր է գնում,

Ո՛չ ինքը գիտի թե ի՞նչ է ուզում,

Ո՛չ էլ ուրի՜շը,

Որն ափին կանգնած ավազների մեջ

Մեկ հիանո՜ւմ է

Մե՜կ էլ զարմանում:

Ինձ գի՜րկդ վերցրու,

Տա՜ր ուր պատահի…

Բայց մի՛ մոռացիր-

Հով քամուց բացի կա՛  նաև քամի՜-

Ծովայի՜ն քամի,

Ցասումի դանակը խրած սրտի մեջ,

Ու Աստվա՜ծ չանի

Թե որ կատաղի՜,

Թե որ գազազի՜-

Չգիտես ո՞ւմ  կամ

Ի՞նչի վրա…

Մի վայրկյանում օ՛դ կցնդի

Անտարբեր լինելու մարմաջը հիմար:

Է՜հ, ի՞նչ լինելու է, թո՛ղ այն էլ լինի՜

Ինձ գի՜րկդ վերցրու,

Տա՜ր ուր պատահի…

Թե անձրևը նեղանա՜ր…

Ո՞ւմ հետ կխոսեր,

Ո՞ւմ կբողոքեր մարդկային  Սիրտը

Խելագա՜ր-մոլո՜ր,

… Թե անձրևը նեղանա՜ր

Ու հեռանար մի օր….

Այդ ո՞նց պետք է թեթևացներ

Մարդն իր Աչքը

Ծանրության բեռից տխրամած  ու չո՜ր,

… Թե անձրևը նեղանա՜ր

Ու հեռանար մի օր….

… Մարդու հոգին Կհամրանա՜ր.

Կմոխրանար անդարձ

Բուռն կարոտից տոչո՜ր,

… Թե անձրևը նեղանա՜ր

Ու հեռանար մի օր….

Ո՛չ ծիածան  կլիներ-

Ո’չ հույզերի լավաներ,

Ո՛չ  Հմայքի քող…

… Թե անձրևը նեղանա՜ր

Ու հեռանար մի օր….

Կլիներ մութ մի մոլորակ,

Կամ էլ միայն Արեգակ-

Արհավիրքի սովոր,

… Թե անձրևը նեղանա՜ր

Ու հեռանար մի օր….

Ի պահ չէ՛ր տա երկինքը

Հո՜ւյսն իր, հո՜ւյզն իր

Երկրագնդին՝

Եվ անմեղ և մեղավոր…

… Թե անձրևը նեղանա՜ր

Ու հեռանար մի օր….

Մարդը արձան կդառնար՝

կանգնած

Հողին դարավոր,

… Թե անձրևը նեղանա՜ր

Ու հեռանար մի օր….

Աչքերն անվի՜շտ, Աչքե՜րն անցավ…

Ոչ մի բան չարժե՜ կյանքն ինձ նվիրած,

Ինձ նվաճվա՜ծն է ձգել միշտ կյանքում,

Սո՜ւտ անուրջներ են - երկնքից կախված,

Իսկ Տե՜րն իմ առջև

դեռ դո՜ւռ է փակում:

Այս կյանքն ամե՜ն պահ փոխո՜ւմ է գույնը՝

Մեկ ծիծաղո՜ւմ է, մե՜կ էլ մռնչում,

Մեկ բարձրացնո՜ւմ է դեպի կապույտը,

Մեկ էլ իր մթի՜ն

խորքը շպրտում:

Վաղո՜ւց է կյանքը դարձել խեղկատակ,

Արդեն շա՜տ վաղուց  ինձ դուր չի՛ գալիս,

Ես հասկացե՜լ եմ, որ ո՛չ թե հաճախ՝

Այլ հազվադե՜պ է,

Որ վիշտ չի՛ տալիս:

Թե տիեզերքում ինչ-որ տեղ պահված

Ինչ-որ մի կյա՜նք կա՝  առանց վիշտ ու ցավ,

… Կուզեի՜ տեսնել այնտեղ բնակվող

Աչքե՜րը մարդկանց…

Օգնի՜ր ինձ, Տե՜ր

Օգնի՜ր ինձ,  Տե՜ր,

Օգնի՜ր կյանքում,

Բացե՜մ փակված դուռն իմ դեմ՝

Դիմացս փակ դո՛ւռ է ամուր,

Քեզնից բացի ո՞ւմ դիմեմ…

Օգնի՜ր, որ ես դեռ չտեսած

Չբղավե՛մ. «Տեսնո՜ւմ եմ, Տե՜ր»

Օգնի՜ր, որ ինձ դեռ չհասած-

Թվացյալը չդառնացնեմ:

Օգնի՜ր մի կերպ մանո՜ւկ մնալ՝

Հիշողությունս կորցնել,

Օգնի՜ր ա՜յն մի դուռը բանալ,

Որտեղ միայն ես կլինեմ…

Ինձ փորձ պետք չի  ո՛չ էլ տանջանք

Գանգատվելն ինձ չի՜ սազում,

Ինձ գանձ պետք չի այլ միայն ջանք

Ի՜նքս ինձնից զատվելու:

Օգնի՜ր ինձ Տե՜ր, ճամփաս նե՜ղ է՝

Երկուսով տե՜ղ չենք անում՝

Ե՜ս եմ, մե՜կ էլ իմ ստվերը,

Որի՜ց գլուխ չեմ հանում:

Ստվերս մեկ լեզուն հանա՜ծ

Հարձակվո՜ւմ է՝ կծոտում,

Մե՜կ էլ լեշի նման ընկա՜ծ-

Մահացա՜ծ է ձևանում:

… Գլո՜ւխս դիր ա՛յն ծնկներին՝

Ինձ տեսնելիս դողացող,

էլ չե՛մ դիմի փակ դռներիդ-

Մտամոլո՜ր,

Գլխիկոր:

Աչքերն անվի՜շտ,

Աչքե՜րն անցավ…

Ոչ մի բան չարժե՜ կյանքն ինձ նվիրած,

Ինձ նվաճվա՜ծն է ձգել միշտ կյանքում,

Սո՜ւտ անուրջներ են - երկնքից կախված,

Իսկ Տե՜րն իմ առջև

դեռ դո՜ւռ է փակում:

Այս կյանքն ամե՜ն պահ փոխո՜ւմ է գույնը՝

Մեկ ծիծաղո՜ւմ է, մե՜կ էլ մռնչում,

Մեկ բարձրացնո՜ւմ է դեպի կապույտը,

Մեկ էլ իր մթի՜ն

խորքը շպրտում:

Վաղո՜ւց է կյանքը դարձել խեղկատակ,

Արդեն շա՜տ վաղուց  ինձ դուր չի՛ գալիս,

Ես հասկացե՜լ եմ, որ ո՛չ թե հաճախ՝

Այլ հազվադե՜պ է,

Որ վիշտ չի՛ տալիս:

Թե տիեզերքում ինչ-որ տեղ պահված

Ինչ-որ մի կյա՜նք կա՝  առանց վիշտ ու ցավ,

… Կուզեի՜ տեսնել այնտեղ բնակվող

Աչքե՜րը մարդկանց…

Կարոտից հոշոտված

Քո մարմնի մե՜ջ ես մոռանո՜ւմ եմ,

Որ ունեմ անո՜ւն, ազգանո՜ւն,

Մարմինս ու հոգիս իրար հոշոտո՜ւմ են

Ու մարմնիցդ երազնե՜ր քամում…

---------------------------------------------

Ձեռքիս բաժակը ծաղկե՜ց

Սիրելի՜ս,

Կենա՛ցդ էի խմում լռելյայն,

Ու ձյո՜ւն էր թափվում քո սև աչքերից

Թե՜ժ կեսին ամռան…

Քո գեղեցի՜կն էի ըմպում

Սիրելի՜ս,

Քո թաց մետա՜քսը  շուրթերով պապակ,

Անաղմո՜ւկ, խաղա՜ղ,

Անշշո՜ւկ, լռի՜ն,

Ցնորվո՜ւմ էի մահվան տեսք առած…

Դո՛ւրս էի հորդել ես քո աչքերից,

Իսկ իմ աչքերում անապա՜տ էր շոգ,

Սիրո քամի՜ն էր քո բորբ մարմնից

Քշե՜լ,  հեռացրե՜լ

Հուշերը բոլոր…

Հոշոտե՛լ է ինձ կարոտդ անգին,

Հիմար մի տնքո՜ց  ցա՛վ է պատճառում,

Երա՛խն է բացել երեկոն կարմիր

Կա՜մքն է իմ ըմպում…

Կգա՞  ինչ-որ պահ, որ քո աչքերում

Կարթնանան կապույտ աչքերս դարձյալ,

Ու քո աչքերի լռի՜ն խորքերում

Հարություն կառնի՞

Մի հեռու անցյալ…

Կյանքը, սիրելի՜ս,  կատա՜կ է տխուր

Եվ ժամանա՛կն էլ  խեղկատակ է սի՜ն,

Ի՞նչպես եմ այսօր ես քուն մտնելու,

Ո՞ւմ եմ հղելու

Տողերս վերջին…

Թող ե՛ս լինեմ ցա՜վդ վերջին,

Խո՜հս թաղեմ իմ  ներսում,

Մե՜ղքդ լինեմ ես առաջին,

Ու հեռանա՜մ

Հորիզոնում հանգչելու…